Хутчэй бы ўсё скончылася

penbelarus.org · Ганна Комар - Хутчэй бы ўсё гэта скончылася

ноч на аўтадазвоне
гудкі – як дручкі,
гумовыя кулі 
усе на аднаго 
130, 131 – працяжны,
як да ранку тварам у бетон
як непрытомнасць, з якой вырывае 
новы ўдар
як трое сутак без ежы

няма адказу на ўсе нашы
белыя кветкі 
чырвоныя сэрцы 

чалавечае цела і памяць 
вытрымліваюць траўмы, 
несумяшчальныя з верай у лепшае 
пераймяноўваем колеры на 
“страх”, “трывогу”, “жалобу”
“супраціў”, “чаканне”, “надзею” 

калі ўсё гэта скончыцца
я дапамагу табе фарбаваць 
гэтыя голыя сцены 

ў белы
чырвоны
белы