руш – Ді̄рґгатамас, сын Учатхйаў
Аґні зьнічу што любіць сядзець на аброчні
прынясі як падсілак прачыстаму лона |
як пакрывам пакрый ты мысьлітваю бога
сьветлавознага яркага цемразабойцу ||1||
дападае двуродны да ежы патройнай
зноў вырастае за год што ён праглынуўшы |
бык ён зацны ў абліку сваім языкастым
слон у другім зьмятае сабою дзярэўе ||2||
дзьве яго маткі ходырам ходзячы ўпобач
пачарнеўшы дзіця нараджаюць супольна |
высалапіўшы язык дымеючы ў гневе
чэпіцца прагна да матак бацькаў кармілец ||3||
запрагаюцца дзеля сьмяротнага мужа
хуткабежныя коні няўрымсьлівы жвавы |
мчаць уроссып яны падганяныя ветрам
па сабе пакідаючы чорны разоры ||4||
вось разьбягаюцца лёгка дымлівыя коні
падымаюць капытамі чорну пачвару |
шпарка шырокім рэчышчам рэючы рушаць
з трэскам імчацца шыпяць і равуць раўліва ||5||
нібы аздоба ён абдымае брунатных
нібы бугай да самак ён рушыць із рэвам |
сілай ярай граючы красуецца целам
нібы бык грозны рагамі трасе няўлоўны ||6||
ён скіда́ных раскі́даных прагна хапае
жонак сваіх спазнае зьлягаецца зь імі |
зноў вырастаюць яны злучаюцца з боствам
іншы аблік у бацькоў сабе сутвараюць ||7||
абнялі яго крэпка калматыя дзевы
падняліся памёршы ізноў дзеля мужа |
забіраючы старасьць іх рушыць раўлівы
вышні дух нараджае жывец непарушны ||8||
покрыў матчын ён вылізвае лізма ўсюды
з войскам жарлівым бяжыць па яе паверхні |
надзяляючы сілай жыцьцёвай хадзячых
чорны сьлед каляі пакідаючы ўсюды ||9||
зіхаці о Аґні ў нашых шчодрападаўцаў
палай дамавіце бугаю сапучы |
ускінуўшы парасткі ты заіскрыўся
як бронь у сутычках мігціш і бліскаеш ||10||
гэта ўмелая пея табе ад няўмелай
хай ад прыемнае нават будзе прыемней |
чыстым і сьветлым што зьзяе ў цябе на целе
Аґні божа для нас ты здабудзь дар-багацьце ||11||
дай нашаму возу і нашаму дому
ў дар лодзь самаходну і самавяслоўну |
якая б вояў нашых людзей шчадроўцаў
змагла пераправіць прытулішчам стаці ||12||
прымі ж ласкава наш урачыстань Аґні
хай Неба-Зямля й самаслаўныя рэкі |
адораць хадатаі гоўем і збожжам
валогай ружавыя і доўгадзенствам ||13||
пераклад з санскрыту